هل النت او المنتدى ممكن يتسبب في جنون أحد الأعضاء ؟!! .. قضي

تفتكري ممكن النت يجننك ؟؟
تفتكري ممكن يحصل لك نوع من انواع الإدمان ؟؟

وتبقى دي حالتك :
هاتولى نت ..انا عايزة نت .. طب اشرب بق واحد بس
طب سندوتش نت واحد بس .. Smile

تبقي نايمة ويصحوا فيكي : zzzz نـــــــــــــــــــــــــــــــــــــت
نـــــــــــــت .. نـــــــت .. نـــت ... نـت .. نت zzzz

هل ممكن من كثرة جلوسك على المنتدى ..
يكون ده موقفك :
صاحية بدري .. قمتى عملتى كوباية شاي + سندوتش جبنة
وفتحتي الكمبيوتر .. واندمجتى جااامد جدا .. ونسيتي الشاي خالص .. اول ما افتكرتيه (طبعا كان برد) ..
روحتى تجري وتقوليله ((( اعتذر للتأخير )))؟!!! وممكن تقوليله كمان ((جراكم الله خيرا .. منتظرين مشاركتك)) .. !!

هل ممكن الواحد يتحول لسيكو نت ؟!!!

قضية مهمة جدااا .. عايزين نعيشها .. نواجهها .. نستفيد من الصح والغلط اللى فيها
نوازن حياتنا صح .. فنعيشها صح لله باذن الله
سنتناول القضية: بحكم تجاربنا الحياتية وكمان الناحية العلمية ..
انتظرونااااااا
نـــــــــــــت
نـــــــــت
نــــــت
نــــت
نـت

اذا قاعدة ع النت لييييييييه ؟؟

اهم حاجة واول حاجة .. انتى قاعدة ليه ؟؟ .. بتعملى ايه ؟؟

بتقرأى معلومات جديدة

شغالة في موقع اسلامي ؟؟؟

تعملى في الدعوة ؟؟

بتكونى صداقات جديدة ؟؟
طب صحبة صالحة ولا ؟!!!

ليكي صدقة جارية على النت ؟؟؟

نسأل الله لك صلاح الحال ......

طب ممكن سؤال :

ماما طفت النور ...... اخواتى ناموا ...... والدى نام من زمااان علشان رايح الشغل
وانا قاعدة ع النت (( كالعادة))
هل هتفرق كتير لما تقعدي في وسط أهلك ؟؟ او تقعدي لوحدك ؟؟

همممممم ...

هل ممكن تفتحى موقع اباحي .. ؟

انا ......... لا طبعاااااااااا

انتى متأكدة ؟؟

ايوة طبعا انتى بتحكي في ايييييييه ؟!!

طب بلاش انتى تفتحيه بارادتك ... هو اتفتح غصب عنك ..
هل هتشوفي فيه ايه ؟؟ .. حب استطلاع ؟؟

لا طبعااااا هقفل على طول
بس ده لو اهلك قاعدين .. طب لو نايمين وانتى لوحدك ؟؟

........

((( وقل للمؤمنات يغضضن من أبصارهن ويحفظن فروجهن ... )))

مين اللى بيقول كدة ؟؟؟
ربنا جل وعلاااااااااا
بيكلم مين ؟؟
انتييي
اوعي تستهونى ... ده كلام خطييييير .. ممكن اوى الشيطان يوقعك ..
بس انا ملتزمة ..
للاسف الفتن لا تعرف كبير ولا صغير .. ملتزم او غير ملتزم

* اوعى تقولى انا داخلة موقع كذا علشان ابعت تقرير سئ عنه علشان يتقفل وتتفتني
* اوعى حد يبعت لك فيديو اسلامي جمييييل من موقع زي يو تيوب تتفرجي عليه واعلان يشدك تفتحيه
سواء اغنية .. فيلم ... مناظر وحشة .. كفاية كدة ....

* لا تقل للدهر خلوت يوما ولكن قل عليا رقيييييييييييييييييييب

* خلى الكلمة دي ادام عينيكي اووووى
* واتقي الله
* واعرفي كويس اوى ان اى اغنية تشوفي اعلانها فيلم كذا او كذا شوفتي الاعلان ومافتحتيهوش ليكي اجر عظييييم باذن الله
ولو فتحتيه ... معاذ الله ... العكس .!!

من الآن ...... اى معصية في السر كنت بعملها .. او عملتها في مرة .. بارادتى او بغير ارادتى
اتوب الآاااان وفوراااا لعلى لن اكمل الموضوع اصلا

**********
هنتكلم المرات الجاية عن ..
** ازاى استفيد من النت
** امتى اقعد ع النت
** امتى يحرم عليا الجلوس عليه
** ازاى انظم وقتى
** داخلة على دراسة واتعودت على النت .. ازاى اوفق بين ال2
** علاج الادماااااااااان

الحلقة الثانية :: أسأل مجررررب

ازاى اوفق بين دراستى والنت ؟؟
بعد ما اتكلمنا عن انا بقضي اصلا وقتى في ايه على النت
وتبنا من اى ذنب كنا بنعمله ع النت
وعزمنا على عدم العودة واننا نستخدمه صــــح ..

نيجي لنقطة انا عندي دراسة
بكرة امتحان الميد تيرم
في شيت لازم يتقدم بكرة
تخيلي انهاردة امتحان العملى !
الاسبوع الجاي آخر معاد لتسليم البحث
!!!!!
كفااااااااية ..
بس تفتكروا هيهمني ؟؟
بردو هقعد ع النت ..
ماهو ه شغل وده شغل .. بس ده جاى على هوايا

نقف هنا ونقولك sto0Op

في 3 حاجات مهمين جدااا ::
تحديد الهدف / ترتيب الأولويات / تنظيم الوقت صح

الحلقة دي هنتكلم عن أول نقطة ..
ايه هي ؟؟؟؟
تحديد الهدف والجزء الأول من ترتيب الأولويات ..
لازم ارتب أولوياتي .

مين اولويات دي .. ؟!!!

أولوياتى بعنى .. الأهم فالمهم فالأقل أهمية

زي ما عرفت انا بقعد ع النت ليه .. لازم اعرف انا بدرس ليه ؟؟
بدرس علشان اخدم ديني .. علشان اتفوق .. واكون مسلم ملتزم متفوق قدوة لغيري .. احبب الناس في الالتزام .. وآخد ثوابهم .. احسسهم ان مفيش حاجة اسمها ملتزم فاشل بل العكس تماماااا .. علشان اقرب من ربنا اكتر لأن اكتر ناس بتخشى الله العلماء فكل ما اتعلم اكتر احقق معنى التقوى .. زي الغرب اللى بيتعلموا مثلا الفلك ويدعوهم هذا العلم للتفكر ويدخلوا الاسلام .. ادعو اصدقائي والناس كلها لله بسلووكي .. انفع الناس بعلمى ((في مفاجأة بخصوص النقطة دي قريب أوى)) .. ارضي والديا عنى .. ابرهم اشد البر فهم طريقي للجنة .. ادخل السرور على قلوبهم .. انفع ديني بتفوقى .. لو طبيب لو مهندس لو مدرس لو محاسب .. في اى مكان وفي كل وقت بكون مثال صح في المكان الصح

من الآخــــــــر :: عايز أوصل للمثالية والتميز اللى هم اصلا هدف الساحة دي

من كل اللي سبق هنكتب شوية معادلات حلوة اوى
الدراسة والعلم والتفوق = مهمين جدا في حياتى
النت والدعوة إلى الله والعلم اللى على النت = من أهم الحاجات في حياتى

الدراسة + النت = جزء كبيييير من حياتى

بس عايزين نعرف مين الجزء الأكبر ؟
مين الاهم دراستى ولا النت ؟ طب هم ال2 بيشكلوا اد ايه من حياتي ؟

هو ده ترتيب الأولويات :
اعرف حجم الحاجة دي ايه؟ .. ايه اهميتها بالنسبة لى؟
مين الأهم فيهم ؟ وارتب اولوياتى

هنخلى بالنا من نقطة مهمة جدااا
ان في الدراسة تحقيق بر الوالدين ورضاهم وقبلهم رضا ربنا عني و ..
اذن بشتى المقاييس دراستى والعلم اللى بتعلمه تكتسح المرتبة الأولى

واحد يقول طب والدعوة ع النت ؟؟
نقولك انت بتدعو على النت الاجازة كلها والدراسة ادامك فرصة اكبرررر تدعو فيها لله زي ما قلنا بسلوكك وبالدعوة المتعارف عليه انك تاخد بيد واحد مش ملتزم تجذبه ليك .. تساعد اصحابك ف الدراسة .. توزع على احب اصدقائك كتيبات صغيرة .. (مش تجري في الكلية توزع على كل الناس بدون اذن ادارة الكلية ؟!! .. اوعي )
انتى مطالبة بالدعوة ومطالبة تحافظى على نفسك وترضي ابوكي وامك

تمام كدة قربنا نوصل ..
يبقى المرتبة الاولى :: دراستى
المرتبة الثانية :: جلوسي ع النت

طيب هل معنى كدة مقعدش ع النت
لا طبعااااا
ده انتى شبه مدمنة .. بس مش هو ده السبب اللى هتقعدى علشانه
وانما علشان الحياة مش هينفع تكون كلها دراسة .. مذاكرة .. اكيد في قسط من الراحة .. وانتى اللى هتحددي تقضيه ازاى

يعني لو عندك مذاكرة .. ابدأي بيها ثم تجلسي على النت
لأن لو بدأتى بالنت هتتشتتي ومش هتركزي في ولا كلمة من اللى هتتذاكر

وحددي هدفك كويس اوى اوى وده هيعينك كتير بس بعد الاستعانة بالله طبعا

اذن لازم انظم وقتى .. وارتب اولوياتي .. نكمل الحلقة الجاية مع تنظيم الوقت وعلاقته بترتيب الأولويات .. والخطة المثلى للتفوق

الحلقة الثالثة ::
ماما بتناااااااادي ....

موقف من الواقع :

يا محممممممد ...يا محمممممممد
ايوة يا ماما
تعالى عايزاك
ثواني بس يا ماما
بسرعة
طيب هخلص اهوه
......
....
ويمضي الوقت
...
..
يا محممممممد ... انت يا ابني
والله اهوه قربت اخلص
تعالى يا ابني عايزاك
طيب حاضر
..........
.......
روح يا محمد قلبي وربي غضبانين عليكي ..
او
روح يا محمد اللاهي ما تكسب !!

ده حال كام واحد أو واحدة فينا ؟؟؟
عقوق ... عصيان وانتى مش حاسة !! ...
والعواقب معروفة : عدم رضا والديكي وقبلهم ربنا جل وعلا .. ضياع الأوقات وعدم البركة فيها ومن ثم ضياع الأعمار و..و.. وتتوالى المصائب !!!!!

طب تعالوا نشوف الموقف ده كمان :
همم .... هاها .. تا لالالالا
داخل مزاجه رايق من الكلية
ااااااه .. مش قادر عايز أنام 3 سنين عشان أفوووق
وفعلا .....
ززززززز
قام من النوم اول حاجة عملها
فتح الكمبيوتر ...
وراك مذاكرة ؟؟؟
اه .. بس هعمل كام حاجة كدة وادخل على كام سايت وبعد كدة اذاكر
وبعدين فكك مني هو انا هبدأ مذاكرة من أول يوم ..
يا ابني انت مش عايز ترضي امك وابوك وعايز تتميز في حياتك وتبدع ..
ايوة بس اصل الهمة بقة وانت فاهم الباقي ..
طيب يبقى زي ما قلت لك رتب أولوياتك وانطللللللق
ذاكر ع الأقل نص الكمية وبعد كدة اقعد ع النت ...

المواقف اللى فاتت دي معظمنا الا من رحم ربي بتكرر معاه وكتيير جدا للأسف ... يمكن يفوق يومين من الغيبوبة دي لكن بيرجع لها تاني !!

لو عرف حق ربنا وحق أمه وابوه واد ايه البر ده مهم في حياته .. كانت حياته اتغيرت من الألف إلى الياء وأنا بكلم نفسي قبل ما بكلمكم ..
لعلي لما بكتب بتشجع على التنفيذ والله المستعان ..

اظن بكدة احنا فهمنا كويس أوى معنى أرتب أولوياتي ...

جزاك الله كل خير على هذة السلسلة المفيدة والواقعية
وجعلة فى ميزان حسناتك

جزاك الله كل خير على هذة السلسلة المفيدة والواقعية
وجعلة فى ميزان حسناتك

بجد موضوع راااااااااااائع هل النت او المنتدى ممكن يتسبب في جنون أحد الأعضاء ؟!! .. قضي Icon_cheers

ومهم
بجد استفدت كتييير من
شكككككككرا