من حواديت جدى

[center]احكى يا جدى وودنى معاك
احكى ايامك احكى ألامك
احكى الفرحه وهات أحلامك
احكى يا جدى وقول على مهلك
أيام مجد بلادى ومجدك

عارف يا ابنى
وسط اليأس بيجى النور
عزمك يا ابنى سيف الحق
صوته بيكشف كل الزور
سيبك من كداب الزفه
إنت الريس 00 طول ما فى إيدك يا ابنى الدفه
جدك عاش العمر حروب
فوق لجبال وف وسط بحور
عارف يا ابنى
شوكه اتزرعت غدر فى أرضك
شوكه شيطانى
ومشيت حافى ودست عليها
لازم طبعا توجع رجلك
وعشان تطلع 0000
لازم تنزف نقطة دم
لحسن بالميكروب تتسمم
وزمان قالوا مش ببلاش انك

هى دى يا ابنى حكاية حرب
لسه الكون عنها بيتحدت
عارف يا ابنى
حبة مطاريد مالهم مأوى
جُم على سهوه
نزلوا فى غفله
سرقوا الدار والأرض بعافيه
ويّا الحيله
أعلنوا دوله ونصبوا الحفله
فرح الغرب عمل هليله
عارف يا ابنى
مصر بقالها زمان مقصوده
مصر بدايه وليها العوده
لكن ربك هو حاميها
من كل الشياطين أعاديها
عارف يا ابنى شريط قدامى
بيرجع تانى
مارد بالطيران بيفجر كل حدادى البر التانى
اضرب تسلم ايدك عدى
يالله يا خالد 00 يالله يا حمدى
اعبر بينا البر التانى
خلّى سلاحك يا ابنى صيامك 00
تفطر على نصر الرحمان
خلّى سلاحك يا ابنى إيمانك 00
واضرب إضرب فى المليان
شد السلم فوق الساتر
اطلع يا ابنى لفوق للعالى
دك حصون وغرور الغادر
إرفع راية مصر وكبر
للى جعلها آمان وسلام
بدد يا ابنى بنور رشاشك يأس ظلام
قالها رسولنا : خير جنود الأرض جنودنا
ألف صلاه وسلام يا رسولنا
ألف صلاه وسلام

عارف يا ابنى
كان لعداء بيموتوا بخوفهم من بركان السخط فى وشى
عارف يا ابنى عمك حبشى
أجبن واحد كان فى العزبه
كان فى الشمس يخاف من ضله
ولا يمشيش فى الضلمه لوحده
أهو ده صاحبى
جارى وكان فى الوحده معايا 00 وكان فى الجبهه
لسه بيرفع إيده هيضرب بالرشاش
جه ليهودى شلل رعاش
عمك حبشى جاب ليهودى شلل رعاش !!!!
سلم كل كتيبته ومات 00 يالله فى داهيه
شفت بعينى عمك حبشى كما البركان
نار بتولّع كل مكان
مين كان قال على عمك حبشى هزيل وجبان ؟؟!!
عمك حبشى وغيره وغيره من الأبطال
إللى أسر خمسين دبابه
واللى اتوغل جوه الغابه
طالع بإيديه كلاب وديابه
شغل رجال 00 لسه فاكرهم
إللى هناك فى الجنه بينعم بالخيرات
واللى بيحكى الحرب لأهله فى الحكايات !!!!

عارف يا ابنى 00
عدينا سينا مش معقول
عدينا سينا بعون الله
عدينا سينا هزمنا الغول
لأ مش غول
إحنا هزمنا الخوف جوانا
وف رمضان 00 فى اكتوبر 73
ليلة القدر كانت ليلتين
إيه راح اقول
عارف يا ابنى إقرا فنون الحرب كويس
تبدأ يا ابنى بقرار ريس
نفسى أعدى البر التانى
واضرب تانى
نفسى ياريس
نفسى ياريس