رسالتى اليك يا مصر

رسالة من مصرى صعيدى لمصر آه يامص وآه يامصر أنا أهو يامصر.....رافع الأيادى.....شايفانى؟ أنا أهو يامصر.....بإسمك بنادى..... سامعانى؟ أنا أهو يامصر....واقف فى الميدان ... والميدان عنوانى ماعدتش أعرف لى غيره مكان وحالف ما أبيع مكانى فى الميدان بألف قصر.... ولا إيه يامصر؟ آه يامصر وآه يامصر والبيه يقولى إيه ؟ بيع مكانك حشتريه وأنا أبيعه ليه؟ دا مكانى أولّى بيا وأولّى بيه واللى عاوزله مكان...... وسط الميدان ينزل ويعمل بالأماكن حصر ..... ولا إيه يامصر؟ آه يا مصر وآه يامصر الميدان كان زمان..... صينية لف ودوران أما النهاردة....... رمز الإستقامة رمز الرجولة ....والكرامة.......والشهامة رمز ضىّ الشمس بيزيح الغمامة رمز ثورة شعب مصر الله يامصر الله يامصر فى كل مكان بالميدان سجدت جباه وكل مكان بالميدان تمنه غالى ع الطغاة هذا المكان ... تمنه الحياة وهذا المكان... تمنه روح الشهيد ودم الشهيد أصبح نشيد وكفن الشهيد ..لبسه الجديد ... بتاع العيد واحنا ... عيدنا يوم النجاة هذا المكان... تمنه دم الوريد ونبض الحياة للوليد والولد نازل يجيب لك نصر آه يامصر وآه يامصر هذا المكان... تمنه صد البلطجية ع الدواب اللى همّا أجهل من دواب راكبين جمال... راكبين خيول.. راكبين دماغهم وبينهشوا فى لحم الشباب شايلين يابلدى سلاح رافعين علينا السلاح وسابوا فى رووسنا كسر آه يامصر وآه يامصر واحنا أهو جينا يامصر جينا ورفعنا الصوت ومع كل شمس تفوت نقسم ما بينّا القوت وعشانك يابلدى نموت لجل ما تعيشى يامصر وحالف ما أبيع مكانى فى الميدان بألف قصر ويظل الميدان طول الزمان رمز ثورة شعب مصر الله يا مصر الله يا مصر

الله عليك وعلى وعلى كلماتك المبدعة
احييك على فنك الراقى ومجهودك المقدر
اتمنى لك التوفيق من كل قلبى ودائماً الى الامام
مبوب مصر - إعلانات مجانية